سلام

عزیز دوستلار بو بیاناتی قوروپدا درج اتمه یی خواهیش ائدیریک

رداکسیا هیئتی

1385-جی ایل خرداد قیامی  مناسینتیله بیانات

1385-جی ایل خرداد آیین بیرینده آذربایجان خالقی  اؤز تاریخی مجادله­سینده بیر داها اونا اولان ملی ظلم و عدالت­سیزلیه قارشی  عصیان ائتدی. بو حاق سسی بهمن انقلابیندان سونرا ایلک دفعه اولاراق آذربایجانین بوتون شهرلرینده اوجالدی.

بو عصیان میلتیمیزه اولان تحقیره قارشی باش وئردی و بو قیامدا خالق گؤستردی کی، کیمسه اونون منلی­یینی تاپدالایییب و تحقیر ائده بیلمز. کوچه و خیابانلارا آخینان انسان سئلینین "هارای هارای من تورکم" باغیرتی­سی هله­ ده قولاقلاردا عکس صدا وئریر.

بو گون مینلرله آذربایجان تورلری کوچه­لره چیخاراق مرکزی و یاخود تهران دؤولتینین رسمی قزئتی طرفیندن ائدین تحقیره اعتراض سسینی اوجالداراق سببکارلارین جزالاندیریلماسینی ایره­لی سوردو. لاکین شووینیست رژیمینین مامورلاری سببکارلاری جزالاندیرماق عوصینه  اعتراض ائدن انسانلار را هجوم ائدیب دیوان توتماغا باشلادیلار.  بو هجوم دا بیر قوروپ نفر شهید اولوب، یوزلرله یارالانیب و مینلرله توتولوب حبس ائدیلدی.

بو قیامین یاتیریلماسینا  باخمایاراق، آذربایجان خالقینین اجتماعی شعورو بیر گونده یاریم عصر ایره­لی گئدیب و بیر داها باشا دوشدو کی، مرکزی ارتجاع بوتون گوجو ایله خالقا قارشیدیر و اونون حاق سسینی ائشیتمه­یه­جکدیر.او درک ائتدی کی، مطلق بو ارتجاعایا قارشی ایراندا یاشایان بوتون خالقلارلا بیرلیکده مبارزه آپارمالیدیر.  خالق درک ائتدی کی، 60 ایل اونجه قوردوغو ملی حکومت ده مرکزی ارتجاع طرفیندن دؤریلیب و خالقین مینلرلره فداکار اوغول و قیزلاری شهید، سورگون و جلای وطن اولموشلار.

بو قیامین باش وئرمه­سی خالق اوچون یئنیدن بیر مبارزه درسی ایدی کی، اونا گؤستردی کی، تک باشینا مبارزه غلبه ایله نتیجه­لنمه­یه­جکدیر. او باشقا ملتلرله بیرگه آددیملاییب و مبارزه ائتمه­لیدیر.

خالق باشا دوشدو کی، مشروطه، خیابانی و پیشه­وری حرکاتلاری مغلوبیتله نتیجه­لنمیشدیر. دوغرودور بو حرکاتلار آذربایجان خالقینی مبارزه تاریخینده بیر ملت کیمی یئتیشدیردی، لاکین تأسفلر اولسون بو حرکاتلار مغلوب اولدو.

1385-جی ایلین قیامی ملی کیملیک و هویت باخیمیندان 60 ایل مبارزه تاریخینده أن گوجلو حرکات ساییلیر. اونا گوره کی، خالق کوتله­لری  اؤز شعارلاریندا بو ملی کیملی­یی اورتایا قویدولار. "هارای هارای من تورکم" شعاری اونو گؤستریردی کی، بو ملت تاریخ، مدنیت و دیل باخینیندان ایراندا یاشایان باشقا ملتلردن فرقلنیر. باخمایاراق کی، اونلارلا بیر سیاسی جغرافیا آلتیندا یاشاییرلار، لاکین آیری-آیری هویت داشییرلار. هویت و کیملیک ایسته­ییی بو قیامین اساس ماهیتی ایدی.

بو گون آذربایجان ملتین بوتون سیاسی اجتماعی تشکیلات و شخصیتلری بو کیملیکدن چیخیش ائتمه­لی و بو قیامین ماهیتینی هر آن خالق کوتله­لرینه آشلامالیدیرلار. بو درس ملتی آسیمیلاسیادان قورویوب ساخایاجاقدیر.

بیز آذربایجان دمکرات فرقه­سینین اعضاء و هوادارلاری اولاراق افتخار ائده­ بیلریک کی، 65 ایل اول آذربایجان دمکرات فرقه­سی سید جعفر پیشه­ورینین رهبرلی­یی ایله آذربایجان خالقینی بیر میلت کیمی ایران تاریخینه حک ائتدی و ائله فرقه یارانان گوندن بو هویت و کیملیک اونون مرامنامه­سینده یئر آلدی و  فرقه بو خط-مشی ایله گئدرک 1324-جو ایلین 21 آذر گونو "21 آذر" قیامی ایله آذربایجان ملی حکومتی تاریخی گئرچه­یه چئوریلدی. بو حکومتین عؤمرونون  بیر ایل اولماسینا باخمایاراق، آذربایجان خالقینی ملت کیمی فورمالاشدیردی.

بیز بو گون یئنه ده 21 آذر حرکاتیندان درس آلمالی و اونون تجربه­سیندن بهره­لنملی­ییک و نه ائتمه­لی سئوالینا جواب تاپمالی­ییک.

بیز آذربایجان دمکرات فرقه­سینین اعضاء و هوادارلاری اولاراق آذربایجانین بوتون سیاسی و اجتماعی  تشکیلات و شخصیتلرینه مراجعت ائدیب، اونلاری بیر مشترک و بوگونکو رئاللیغی عکس ائتدیرن پلاتفرم اطرافیندا بیرلشمه­لی­یه چاغیریریق. همچنین ایراندا اولان باشقا ملتلرله مرکزی ارتجایا قارشی دمکراتیک مبارزه­ده بیرگه مبارزه ائتمه­یه سسله­ییریک. بو تارخی گئرچکلیکدیر. بیزیم مبارزه تاریخیمیز بو حقیقتی آچیق آیدین گؤستریر.

نوشته شده در تاریخ پنجشنبه 30 اردیبهشت 1389    | توسط: pipi pipi    |    | نظرات()